ГАЛУБЦЫ З МАЛАДОЙ КАПУСТЫ І ПШОНКІ

коўшык 78

МУЖЫК З ЖОНКАЙ СВАРЫЦЦА, ПАКУЛЬ КАПУСТА ВАРЫЦЦА...

Мужык з жонкай сварыцца, пакуль капуста варыцца... пакуль варыцца і мы зірнем на капусту бліжэй. Тым больш, што акурат з’явілася маладая і сакавітая.

Як кажуць археолагі, а мы верым, людзі выкарыстоўвалі капусту яшчэ ў каменным стагоддзі. Для нашых продкаў яна была адным з асноўных прадуктаў. Яе квасілі, смажылі, рабілі супы, бігасы і галубцы. Традыцыйнай стравай лічылі капусняк – з дробна пакрышанай капусты дадаткам бульбы, грыбоў і мяса. Даўней, асабліва на Палесіі, у капусту дадавалі муку (рабілі закалоту), каб менш спажываць хлеба.

Сёння мы цэнім капусту за яе нізкую каларыйнасць, багацце клятчаткі і вітамінаў С і U (так называлі супрацьязвавы фактар, што знайшлі ў капусце). Яна зніжае халестэрын і лякуе страўнік. А таму белакачанная на маім стале застанецца... Ну можа не ў зусім традыцыйным варыянце.

патрэбна:

капуста

2 шклянкі гатаванай пшонкі

цыбуля

2 зубкі часныку

жменя вяленых таматаў

соль

перац

на соўс:

500 гр. таматавага соусу «Менскі»

2 зубчыкі часныку

алей

2 лыжкі нарэзанага свежага базіліка

соль

перац

Робім фарш. У невялікай колькасці алею абсмажым дробна нарэзаны лук і часнык; у самым канцы дадаем дробна пакроеныя вяленыя памідоры. Заліваем некалькімі сталовымі лыжкамі вады і пакідаем на 10 хвілін. У місцы змяшаем яшчэ цёплую кашу з засмажкай. Дадамо соль і перац па смаку.

Робім соус. Падсмажваем на алеі нарэзаны лустамі часнык. Дадаем таматавы соус і гатуем хвілін 10. Заправім соллю і перцам ды базілікам.

Робім галубцы. Капусту кладзем у вялікі рондаль з кіпнем. Гатуем і праз некалькі хвілін здымаем знешнія лісце капусты і кладзем галоўку назад у рондаль. Праз некалькі хвілін паўтараем аперацыю. Пакуль у вас не будзе дастатковай колькасці лісця для галубцоў. Нажом асцярожна адразаем найбольш грубыя часткі з лістоў. На лісце кладзем лыжку начыння і загортваем галубец. Гатовыя ўкладваем у рондаль і заліваем соусам. Тушым хвілін 30-40 хвілін на вельмі слабым агні. Час ад часу праверце ці не падгарэлі. Падаем з соусам.

Мужык з жонка сварыцца, пакуль капуста варыцца. Капуста зварылася, з’елі, памірыліся. Смачна есці!